Псалтирь (церковнославянский)
Глава 84
1 В коне́ц, сыно́м Коре́овым, псало́м
2 Благоволи́л еси́, Го́споди, зе́млю Твою́, возврати́л еси́ плен Иа́ковль:
3 оста́вил еси́ беззако́ния люде́й Твои́х, покры́л еси́ вся грехи́ их.
4 Укроти́л еси́ весь гнев Твой, возврати́лся еси́ от гне́ва я́рости Твоея́.
5 Возврати́ нас, Бо́же спасе́ний на́ших, и отврати́ я́рость Твою́ от нас.
6 Еда́ во ве́ки прогне́ваешися на ны? Или́ простре́ши гнев Твой от ро́да в род?
7 Бо́же, Ты обра́щься оживи́ши ны, и лю́дие Твои́ возвеселя́тся о Тебе́.
8 Яви́ нам, Го́споди, ми́лость Твою́, и спасе́ние Твое́ даждь нам.
9 Услы́шу, что рече́т о мне Госпо́дь Бог: я́ко рече́т мир на лю́ди Своя́, и на преподо́бныя Своя́, и на обраща́ющыя сердца́ к Нему́.
10 Оба́че близ боя́щихся Его́ спасе́ние Его́, всели́ти сла́ву в зе́млю на́шу.
11 Ми́лость и и́стина срето́стеся, пра́вда и мир облобыза́стася.
12 И́стина от земли́ возсия́, и пра́вда с Небесе́ прини́че,
13 и́бо Госпо́дь даст бла́гость, и земля́ на́ша даст плод свой.
14 Пра́вда пред Ним предъи́дет, и положи́т в путь стопы́ своя́.